قاري رفيع الله مشال
د ټولې نړۍ د اسلامي او غير اسلامي دولتونو سرتېري دندې ته له مادي پلوه نظر کوي او کار يې هم په هېواد د ننه د څو اشخاصو او څو کړيو د ګټو ساتنه وي.
په روزنه کې هم دا ور زده کېږي، چې [امر له روا او ناروا پورته دی]بايد عملي شي.
زما دا توري د هغو لپاره نه دي، بلکې د اسلامي نظام سرتېري ته دي او غږ پرې کوم چې ای د اسلامي نظام سرتېريه!
په دې خو خبر يې چې زموږ نظام د نړۍ د نورو اسلامي هېوادونو غوندې د کفري نړۍ د غلامي واګي په غاړه نه لري. نه مو سياست د بل چا په خوښه چلېږي، نه د اقتصادي ګټو په خاطر د چا ناروا فرمايشونه منو، نه د خپل ځان د بقا لپاره پردي پوځونه په خپل کور کې دېره کوو او نه د پرديو قوانينو د درناوي لپاره خپل ديني او وطني ارزښتونه له پښو لاندې کوو.
خپله منو، له خپل دينه په هېڅ صورت کې نه تېرېږو ، پردي او باطل افکار په خپله خاوره نه منو او…
دا ټکي په ليکلو او لوستلو کې ډېر آسانه دي، خو په عمل کې دا کار د اور سکروټې په لاسو کې نيول دي،همدا پورته څو ټکي دي، چې نړۍ له موږ سره دښمني لري او کوشش کوي د غلامۍ هغه واګي چې د نورې اسلامي نړۍ د واکمنانو په غاړه کې يې اچولي دي ؛ موږ ته هم واچوي.
نو ای د اسلامي نظام سرتېريه!
ته د همدې نظام عسکر يې ، ته به دا نظام ساتې ، ته د همدې نظام قوت او د ملا تير يې، ته ځوان او با انرژي يې، ته هغه څوک يې چې خوب ،خوراک ، خندا او خبرې دې په عبادت شمار دي.
تا ته د دې ملت سترګې دي. ستا د راتګ په انتظار کې يې کلونه کلونه سختۍ وزغملې،تا ته چې نړۍ له مرګه بغير بل انتخاب نه درلود ؛ دې ملت په غېږ کې ونيولې.
ستا په سر يې بمبار ،چاپه ، زندان او تعذيبونه وګالل.
ای د اسلامي نظام سرتېريه!
زه باور لرم، چې ته به خپل مسئوليت ته متوجه يې خو بيا هم څو ټکي در يادوم.
دا کړېدلی ملت سخت د مينې تږی دی، ډېر د رحم او شفقت وړ دی، ډېر زخمونه يې بې درمانه پاتې دي او په زخمي زړه کې ډېرې هيلې لري.
پام! چې دا ملت درنه آزار نه شي ، د دې ملت د هيلو غوټۍ درنه مړاوې نه شي، د دې ملت په خلکو ظلم ونه کړې.
پام! چې په خپله سپينه جامه داغ ونه لګوې،ځکه چې ته د دين له آدرسه راغلی يې ، ستا فردي جرم او ګناه مدرسې ،جومات، کتاب ، پټکی ، ږيره او دين ته منسوبېږي.
پام! په خلکو بې ځايه سختي ونه کړې! هسې نه ستا د سختۍ له امله خلک له اسلامي نظامه زړه توري شي ، دا ملت ملامت نه دی ، د دوی په فکرونو کې شل کاله دښمن کار کړی ، زه او ته يې ورته د بلا په شکل معرفي کړي يو، زما او ستا له نوم سره يې ورته د وېرې او هيبت تصوير وړاندې کړی، زه او ته يې ورته قصابان او جلادان معرفي کړي يو ، نو اوس به د دې خلکو په زړونو کې زه او ته په عمل سره لاره جوړوو او د دښمن تبليغات به غلط ثابتوو.
پام! له وظيفوي غفلته ځان وساته، د وظيفوي غفلت له امله ډېر کله ستر ستر نقصانونه را منځ ته کېږي چې دنيوي او اخروي مسئوليت به يې ستا په غاړه وي. ته بايد ځيرک و اوسې ، ستا دښمن ستا د کمزورۍ له ټکو استفاده کوي ، ته بايد تل چمتو او منظم واوسې.
پام! له بيت المال سره بې احتياطي مه کوه ، د موټر تېل او مرمۍ بې ځايه مه مصرفوه ، په بازار او رش کې تېز مزل او هارنونه مه کوه ، په دې سره خلک اذيتېږي او په زړونو کې يې ستا عزت او درنښت ختمېږي.
پام! خپل ځان او مسئوليت ته په سپک نظر ونه ګورې ، ته خبر يې چې تا ته څومره سترګې په لاره دي؟
د نړۍ په هره برخه کې چې په مسلمانانو ظلم کېږي، نو د اميد او له رب (ج) د سوال ټکی يې دا دی ،چې يا اللّٰه طالبان راولې! ته خلکو ته د امن او عدل مرجع ښکارې ، د نړۍ د مسلمانانو په زړه کې ستا لپاره دومره زياته مينه ځای لري،چې ته يې تصور هم نه شې کولی ، ما ستا په اړه د فلسطين ، ليبيا ، ماليزيا ، شام ، ليبيا ، چيچنيا ، روهنګيا ، برما ،هند ،بنګله ديش او نورې نړۍ د مسلمانانو نظرونه لوستي دي.
پام! چې غفلت ، بې اطاعتي ، ظلم ، کبر ، ګناه، بې عدالتي او سرکشي ونه کړې ځکه چې همدې اسبابو له تا ډېر ځواکمن خلک په ځمکه را خطا کړي دي.
