په کندهار کې د تخنيکي او مسلکي له زدهکړو آمريته فارغ شويو څو تنو مسلکي ځوانانو په ګډه موټر جوړ کړی، چې نن شنبې د کندهار په باغ عمومي لوبغالي کې نندارې ته وړاندې شو. د موټر جوړوونکو له ډلې جميل احمد قريشي وويل؛ کاري ټيم يې په ډېرو هڅو له ماشينرۍ پرته په لاس ((بويک ۱۹۱۰))ماډل موټر د لومړي ځل لپاره په کندهار کې جوړ کړ، چې د ټيم امکانات يې همدومره وو او که ډېر امکانات او ماشينرۍ ورته برابرې شي، نوي او نور ماډل موټرونه به هم جوړ کړي، همدا راز يې د خپلو خبرو په وروستيو کې ډاډ ورکړی، چې يوازې موټر نه،بلکې نورې بېلابېلې پروژې يې هم د کاري ټيم تر لاس لاندې دي، چې هم د اقتصاد له اړخه د هيواد او ولس په ګټه دي او هم به خلکو ته په کې اسانتياوې برابرې شي.
غونډې ته وينا کې د هيواد د تخنيکي او مسلکي ادارې اړوند د حرفوي پروګرامونو د سمون رئيس مولوي عبدالودود هوتک وويل؛ د تخنيکي او مسلکي زدهکړو اداره په هېواد کې ډېره پخوانۍ مخينه لري، چې په ۱۳۹۷ هـ ش کال کې له پوهنې وزارته جلا او اوس په آزاد ډول فعاليت لري، دا اداره د هيواد په ۳۴ ولايتونو کې د زدهکړو ۳۰۰ فعال مرکزونه لري، چې په همدې مرکزونو کې په ۳۰۰ برخو کې ځوانانو ته په لنډمهاله او اوږدمهاله ډول زدهکړې ورکول کېږي.
