د پکتيا مرکز ګرديز ښار کې د ((هوا)) په نامه يوې خصوصي راډيو فعاليت پيل کړی، چې د نورو مسايلو ترڅنګ به په خبري او ښوونيزه برخه کې خپرونې کوي.د هوا راډيو مسئولين وايي: که څه هم په هېواد کې يو شمېر رسنۍ د اقتصادي ستونزو له امله تړل شوې،خو دوی ټولنې ته پر وخت د معلوماتو ورکولو په هدف دغه راډيو جوړه کړې ده.
د دې راډيو مرستيال مبين ميرزا وايي: هڅه به وکړي ،چې په روانو حالاتو کې له اسلامي ارزښتونو او افغاني کلتور سره سمې او د نافذو قوانينو په چوکاټ کې خپرونې وکړي: (( يادې راډيويي شبکې، د افغانستان د ټولو نافذو قوانينو په چوکاټ کې خپل خپرنيز جواز ترلاسه کړی ،چې خوشبختانه د دې راډيويي شبکې ټول فعاليت به په خبري، ښوونيزو او د بشري حقونو په برخه کې وي.)) بل پلو په پکتيا کې يو شمېر خبريالان وايي، چې په دې وروستيو کې په دغه ولايت کې د رسنيو او خبريالانو اقتصادي ستونزې ډېرې شوې دي.خالد ذهين او حبيب الله سراب وايي: له خبريالانو سره په اقتصادي او نورو برخو کې مرستې نه دي شوې او زياتوي ،چې د نړيوالو بنسټونو له لوري ورکړل شوي امکانات، دوی ته نه دي رسېدلي: ((له خبريالانو سره د اړوندو ټولنو له خوا کومه خاصه مرسته نه ده شوې او نه هغه امکانات ،چې دوی ته د نړيوالو بنسټونو له خوا په واک کې ورکړل شوي دي، تراوسه هم پکتيا کې له خبريالانو سره هغه مرستې نه دي شوي.)) ((خبريالان له ځينو اقتصادي ستونزو سره مخ دي، د محلي رسنيو د تقويې لپاره له حکومته مو غوښتنه دا ده ،چې دوی ته د نظام په ملاتړ اعلانات ورکړي او د هغه په بدل کې دوی بايد مالي حمايه کړي، ترڅو رسنۍ په خپله په پښو ودرېږي او نشرات لا قوي کړي. )) په تېرو دوو لسيزو کې په هېواد کې د تصويري، غږيزو او چاپي رسنيو په برخه کې پام وړ پرمختګ او زياتوالي راغلی، خو په دې وروستيو کې د اقتصادي ستونزو له امله ګڼ شمېر رسنۍ اغېزمنې شوې.د اطلاعاتو او فرهنګ وزارت د معلوماتو له مخې له سياسي بدلون وروسته په هېواد کې ۴۴ راډيوګانې بندې شوې، خو لا هم له ۲۰۰ زياتې راډيوګانې فعالې دي.
