د هلمند د کرنې رياست مسئولين وايي، سږ کال يې په دغه ولايت کې د انجې بوټي کرکېلې ډېرولو لپاره هڅې پيل کړې دي. د ياد ولايت د کرنې، اوبولګونې او مالدارۍ رياست د طبيعي بوټو څانګې مدير انجنير محمد اسلم بشردوست وويل: دوی پلان لري چې سږ کال په هلمند کې د انجې کرلو ته خلک وهڅوي. ده زياته کړه: د کرنې رياست درې کاله وړاندې په هلمند کې په تحقيقي ډول انجه وكرله او په وينا يې ډېره ښه پايله يې درلوده. نوموړي وويل: د دوی څېړنو ښودلې، چې د هلمند آب وهوا د انجې کرلو لپاره ډېره مناسبه ده او هيله ده ،چې لا ډېر بزګر دغه بوټى وكري. بشردوست دغه راز وويل د کرنې رياست به ټولو هغو کروندګرو ته روزنه ورکړي چې غواړي په خپلو ځمکو کې انجه وكري.
