مزار- شبرغان پر لويه لاره د يوې ترافيکي پېښې له امله پنځه تنه مړه او څلور تنه نور ټپيان شوي دي. ددغه ولايت د ترافيکو د مديريت د حادثاتو آمر عبدالبشېر فيضي وايي، چې دا پېښه وړم مازديګر د شبرغان ښار اړونده د جيغچي په سيمه کې رامنځته شوې ده. ده زياته کړه ،چې د مسافرو يو ۴۰۴ موټر له سراچه موټر سره ټکر کړی، چې له امله يې پنځه تنه مړه او څلور نور ټپيان شوي دي. د فيضي په وينا، په مړو شويو او ټپيانو کې ښځې او ماشومان هم شامل دي او ټول د سراچې سپرلۍ وې. ده وويل، چې ټپيان ددې ولايت سيمه ييز روغتون ته وړل شوي دي.
