د ماشومانو لپاره د ملګرو ملتونو ملاتړې ادارې ((يونېسف)) پرون د هېواد په ختيځو ولايتونو، ننګرهار، لغمان، نورستان او کونړ کې د پوليو يا ګوزڼ ضد واکسين څلور ورځنی کمپاين پيل کړ.
په افغانستان کې د يونېسف د دفتر وياند کمال شاه، رسنيو ته ويلي، دغه کمپاين چې تر راتلونکې پنجشنبې به دوام وکړي، له پنځو کلونو کمعمره څه باندې يو ميليون ماشومان به پهکې واکسين شي.ده وويل: (( په روان ميلادي کال کې نهه پېښې ثبت شوې وې او دا په يادو سيمو کې د پوليو ويروس شتون ښيي، نو له همدې امله مو ختيځو ولايتونو کې د پوليو ضد واکسين کمپاين کور په کور پيل کړی او تر راتلونکې پنجشنبې به روان وي.))
په ورته وخت کې د ختيځو ولايتونو اوسېدونکي خوښ دی،چې ماشومانو ته يې د پوليو يا ګوزڼ ضد واکسين ورکول کېږي.د لغمان اوسېدونکی عبدالله وايي: (( د پوليو واکسين د تطبيق کارکوونکي زموږ کورونو ته راغلي او زموږ ماشومان واکسينوي، څو د پوليو له شره خلاص شي.))
د کونړ اوسېدونکی امان بيا وايي، چې د دوی په ولسوالۍ کې د پوليو ضد واکسين پيل شوی او خپل ماشومان يې واکسين کړي دي. هغه له خلکو غواړي چې خپل ماشومان د پوليو ناروغۍ پر وړاندې واکسين کړي.د نړيوالو سازمانو د معلوماتو پر بنسټ، افغانستان او پاکستان اوس نړۍ کې يوازيني دوه هغه هېوادونه دي چې لاهم پهکې د پوليو يا ګوزڼ ناروغي په بشپړه توګه له منځه نه ده تللې.
د پوليو ضد واکسين د تطبيق له دې کمپاين سره هممهاله، يوشمېر ديني عالمان ټينګار کوي، چې هېوادوال بايد د روغتياپالانو له لارښوونو سره سم خپل له پنځو کالو کم عمره ماشومان واکسين کړي.
ديني عالم مختارمحمد عثماني وايي، چې د پوليو واکسين تطبيق د ماشومانو لپاره اغېزمن دی او له کورنيو يې غوښتنه وکړه، چې خپل ماشومان واکسين کړي.
د يادونې وړ ده، چې ۲۰۲۲ م کال کې د ټول هېواد په کچه د پوليو يوازې دوې مثبتې پېښې ثبت شوې وې چې يوه يې په کونړ او بله يې په پکتيکا کې وه.
