د جوزجان د پوهنې رياست مسئولين وايي، چې د ياد ولايت د آقچې، خانقاه او خواجه دوکوه ولسواليو کې د نږدې ۱۴ ميليونو افغانيو په لګښت ۵ ښوونځيو ته ودانۍ جوړې او ګټې اخيستنې ته وسپارل شوې.د دغه ولايت د پوهنې رئيس مولوي محمد طاهر جواد د باختر آژانس سيمه ييز خبريال ته ويلي، چې د يادو ښوونځيو ودانۍ د ناروې هېواد په مالي ملاتړ او د اکتېد دفتر له لوري په پاخه او اساسي توګه جوړې شوې دي.
په جوزجان کې د اکتېد دفتر ولايتي مسوول انجنير امان الله امين وويل، چې د اکتېد دفتر د ناروې هېواد په همکارۍ او د ياد ولايت د پوهنې رياست په همغږۍ د ۵ ښوونځيو ته ودانۍ جوړې کړي او په نوي کال کې به ۱۱۰ هغه ښوونځي چې په جزوي توګه ويجاړشوي بېرته ورغول شي.
