د افغانستان د سټنډرډ ملي ادارې د بلخ د مرکز مزار شريف په بازارونو کې د سيخانو د پلورلو د مرکزونو او هټيو د پلټنې او څارنې لړۍ د پيل کېدو خبر ورکړی دی. يادې ادارې د يوې خبرپاڼې په خپرولو سره ويلي ،چې دغه لړۍ يې د افغانستان د وسپنې او فولادو د توليد د فابريکو له اتحاديې سره په همغږۍ پيل کړې او د سټنډرډ ملي ادارې د مطابقت او ارزونې تخنيکي ټيم له لوري د مزارشريف ښار په ځينو برخو کې روان دي.په خبرپاڼه کې همدارنګه ويل شوي، چې دغه لړۍ په هېواد کې د ودانيزو چارو د معياري کولو په موخه له دې وړاندې په کابل ښار کې پيل شوې وه، د سټنډرډ ملي ادارې له لوري په شفافه او جدي توګه پر مخ وړل کېږي. د سټنډرډ ملي ادارې مشرتابه په دغې خبرپاڼه کې په هېواد کې د وسپنې له ټولو پلورونکو او عرضه کوونکو څخه غوښتنه کړې، چې د بې کيفيته وسپنې له پلورلو ډډه وکړي، که نه نو له قانوني چلند سره به مخ شي.
