پېښو ته د رسېدو په چارو کې د دولت وزارت وياند وايي: د تېرو دوو ورځو پر مهال په هېواد کې د بارانونو او واورې ورېدو له کبله درې کسان مړه شوي او اووه نور ټپيان دي. د ياد وزارت د وياند شفيع الله رحيمي وايي: ۷۵۶ کورونه په نيمه او بشپړ ډول ويجاړ شوي دي. نوموړي زياتوي، په هېواد کې د وروستۍ زلزلې پر مهال د مړو شمېر ۱۰ کسانو ته لوړ شوي او شاوخوا ۶۰ نور ټپيان شوي دي. رحيمي وايي: د وري د لومړۍ نېټې په زلزله کې څه باندې ۸۰۰ کورونه په نيمه او بشپړ دول نړېدلي دي.
