د افغانستان د وسپنې پټلۍ ادارې مسئولين وايي: د تېرې شنبې په ورځ يې کابل ته د ازبکستان او متحده عربي اماراتو له راغليو پلاويو سره د غونډې پر مهال په افغانستان کې د وسپنې پټلۍ شبکې پر جوړېدو او پراختيا هوکړه کړې ده.
د وسپنې پټلۍ ادارې وياند سمېعالله دراني رسنيو ته ويلي، په دې درېاړخيزه ناسته کې پرېکړه وشوه ،چې د متحده عربي اماراتو او وزبکستان تخنيکي ډله به په افغانستان کې د وسپنې پټلۍ شبکې د پراختيا په موخه کابل ته راشي او دلته به له افغان لوري سره په ګډه پر يوه ميکانېزم کار وکړي.په ورته وخت کې د ترانسپورټ وزارت وياند امامالدين احمدي وايي، چې دا يې لومړۍ ناسته وه او په راتلونکې کې به دوام کوي. د نوموړي په وينا، په ياده ناسته کې يې د نورو مسايلو تر څنګ، په افغانستان کې د کانونو د اېستلو، د سوداګريزو توکو د لېږد، ترانزيټ او د افغانسان له لارې د سوېلي او منځنۍ آسيا د نښلولو په اړه خبرې کړې دي.دا درېاړخيزه غونډه داسې مهال جوړېږي ، چې همدا يوه مياشت وړاندې يو لوړرتبه اوزبکستاني پلاوي افغانستان ته د سفر پر مهال د تورخم بندر په ګډون، د هيواد د ځينو نورو ټرانزيټي او لويو لارو ليدنه وکړه.د اقتصادي چارو شنونکي بيا باور لري، چې د وسپنې پټلۍ شبکې د جوړېدو او پراختيا په ګډون، په ګڼشمېر برخو کې د ګاونډيو هيوادونو ونډه به د افغانستان په اقتصادي پياوړتيا کې مهم رول ولري.د اقتصادي چارو شنونکي شاکر يعقوبي په دې اړه وايي، چې افغانستان د کورنيو امکاناتو له اړخه کمزوری دی او د اقتصادي او سوداګرۍ برخو کې د سيمې او نړۍ هيوادونو همکارۍ ته اړتيا لري.متحده عربي امارات او ازبکستان داسې مهال په افغانستان کې د اوسپنې پټلۍ د جوړېدو او پراختيا برخه کې علاقهمندي ښيي چې افغانستان اوس د مزارشريف–حيرتان، خواف–هرات، آقينې– اندخوي او تورغونډۍ اوسپنې پټليو له لارې له ازبکستان، ترکمنستان او ايران سره ګډه سوداګريزه راکړه ورکړه لري.
