په اسلام آباد کې د امريکا سفارت ويلي، چې امريکا په تېر ۲۰۲۲م کال کې د افغان کډوالو ستونزو ته د رسېدنې په خاطر له پاکستان سره ۶۰ ميليونه ډالره مرسته کړې. د سفارت د خبرپاڼې له مخې، په اسلام آباد کې د امريکا سفير ډونالډ بلوم ويلي، چې امريکا د ٢٠٠٢ م کال له پيله تر اوسه پاکستان ته د افغان کډوالو د لاسنيوي لپاره ٢٧٣ ميليونه ډالره مرسته کړې ده. تر ټولو زياتې مرستې په خيبر پښتونخوا او بلوچستان ايالتونو کې د روغتيا او پوهنې په برخو کې له افغانانو سره شوې دي. د کډوالو په چارو کې د ملګرو ملتونو د عالي کمېشنرۍ د معلوماتو له مخې دا مهال شاوخوا ۳، ۱ يو اعشاريه دری ميليونه افغان کډوال په پاکستان کې مېشت دي. اټکل کېږي ،چې په دغه هېواد کې تر يو ميليون ډېر افغانان له اسنادو پرته اوسېږي.
