د لوړو زده کړو سرپرست وزير د ولايتي سفرونو په دوام دا ځل په فارياب ولايت کې يوې ولسي غونډې ته وينا وکړه.د لوړو زده کړو وزارت سرپرست وزير شيخ الحديث ندا محمد نديم فارياب ته د سفر په ترڅ کې د دې ولايت د چارواکو په ګډون يوې سترې ولسې غونډې ته وينا وکړه.نديم په ياده غونډه کې د يرغلګرو په وړاندې د فارياب د ولسونو د مبارزې او قربانيو ستاينه وکړه.نوموړي زياته کړه: (اې د فارياب ولسونو! د دښمن په تبلېغاتي جګړه مه تېر وځئ پر اسلامي امارت اعتماد وکړئ، موږ د غرب په غوښتنه د شريعت يو جزء هم نه پرېږدو.))د لوړو زده کړو وزارت سرپرست د يو ملت د ماتې لاملونه نفاق او بې اطاعتي ياد کړل او د لويديځ له لوري يې د اسلامي امارت د شريعت پر تنفيذ، ښځو حقونو او اقتصاد نيوکې بې ځايه وبللې.په ورته وخت کې د فارياب والي داملا شعيب رسالت په ياده غونډه کې وويل (چې د غرب او بشري حقونو د غوښتنو پر اساس تعليم او تحصيل زموږ په درد نه خوري، ځکه زموږ له عقيدې او کلتور سره په ټکر کې دي. موږ د خپلو خلکو لپاره د خپلې عقيدې او کلتور پر اساس يو معياري تحصيلي سيستم غواړو.))د يادونې وړ ده، چې د لوړو زده کړو وزارت سرپرست تر دې وړاندې غور او باميان ولايتونو ته هم سفر کړي وو.
