راپورونه

د اطلاعاتو او فرهنګ وزارت: د هر ليکوال ګټور کتابونه وړيا چاپوو

د اپریل ۲۳مه د کتاب نړیواله ورځ وه، چې له نن څخه ۲۹ کاله پخوا په ۱۹۹۵م کال کې د یونسکو له لوري په دې نامه نومول شوې او له هغې راوروسته دغه ورځ د نورو هيوادونو ترڅنګ په افغانستان کې هم نمانځل کېږي. خپرندویې ټولنې ځانګړي تخفیفونه وړاندې کوي، لیکوالانو ته د تشویق احساس ورکول کېږي او حکومت یې د لا ملاتړ ژمنې کوي. د همدې ورځې په مناسبت وړمه ورځ د اطلاعاتو او فرهنګ وزارت د بیهقي کتاب خپرولو ریاست له لوري دغه ورځ ونمانځل شوه، چې د هيواد لیکوالو، خپروونکو او دولتي مسئولینو پکې ګډون کړی و. دې غونډه کې  د لیکوالو او خپرندویو ټولنو ستونزې واورول شوې، مسئولینو ورسره د مرستې ژمنې وکړې او ویې ویل، چې وروسته له دې د هر هغه لیکوال اثر چې د نشر وړ وي، د اطلاعاتو او فرهنګ وزارت یې ورته وړیا چاپوي.

په همدې مناسبت جوړې شوې غونډې ته د ياد رياست د چاپ او خپراوي آمر حمیدالله ویاړ وويل: ټول هغه کتابونه چې چاپېږي د بیهقي ریاست له تصفیوي نظره تېرېږي، په ۱۴۰۲ کال کې مو ۱۲ ډوله بېلابېل قرانکریمونه په بېلابېلو سایزونو کې چاپ کړل، چې هره برخه یې افغانانو مخته وړې ده او ۱۸ ډوله نور قرانکریمونه د چاپ لپاره وړاندې شوي دي، چې ژر به ترلاسه شي. هغه وایي چې تفسیر په دري ژبه بازار ته وړاندې شوی او په پښتو ژبه کې پرې کار روان دی، دی همدارنګه وایي: د قرانکریم د ښې زده کړې لپاره د تجویدي نظام له مخې نوراني قاعده او اقرأ قاعده په پښتو، دري او پشه یې ژبه چاپ شوې او په نورو ژبو یې د ژباړې چارې په چټکه توګه روانې دي. نوموړی زیاتوي، چې ۵۷ مختلف النوع کتابونه د چاپ په زېور وپسلولل شول او دغه ریاست ټول هغه کتابونه چاپوي چې افغاني او اسلامي ارزښت ولري، اړتیا ورته وي، منځپانګه یې تکراري نه وي، عام فهمه، د پوهېدلو او لوستلو وړ وي او محتوا یې مهمه وي. ده د دې تر څنګ دا هم و ویل چې د بیهقي ریاست به له اړوندو ارګانونو سره په بازار موندنه، د خپرندویو او کتاب پلورنځیو د جوازونو ثبت او صادرولو، مناسب شرایط او مالیې کمولو کې مرسته وکړي.

غونډه کې د شخصي خپرندویو ټولنو په استازیتوب سیدعبدالله باچاه و ویل چې دغې برخه کې خدمت کول یوازې د بیهقي کار نه دی، باید ټول په ګډه کار وکړو او د دې لارې خدمت یې د دنیا او آخرت ګټه وګڼله. نوموړي له حکومته هم وغوښتل، چې خپرندویو ټولنو سره دې په تخفیف او کتاب چاپولو کې مرسته وکړي.

د اطلاعاتو او فرهنګ وزارت د ژباړې برخې سلاکار نظام الدین شایق چې  د ۱۹۴ کتابونو لیکوال دی، وایي چې زه د کتاب په مطالعه باندې خوب راولم هم او تښتوم یې هم. نوموړی وایي چې کوم خوند د چاپي کتاب په لوستلو کې دی، هغه د موبایل یا کمپیوټر په سکرین مطالعه کې نشته او کتاب هغه ملګری دی چې په هر حال کې درسره وي او باور پرې کېدلی شي.

د لیکوالانو په استازيتوب سیداحمد سعید له حکومته وغوښتل چې لیکوالو ته دې عزت ورکړي، چې مقابل کې عزت حاصل کړي او ښه ښه کتابونه چاپ کړي. نوموړي همدارنګه دا هم و ویل: که حکومت د مدرسې، ښوونځيو او پوهنتونونو شاګردانو ته د ځینو اضافي کتابونو د مطالعې سپارښتنه وکړي او امتحان کې ترې نمرې ورکړي، نو د کتاب لوستلو فرهنګ کې به ښه مرسته وکړي.

د یاد وزارت د کاپي رایټ برخې مسئول عبدالحق حماد بیا وایي څنګه چې لازمه وه، هغسې کار نه دی شوی ،خو د نوموړي په وینا د اسلامي امارت په راتګ سره دغې برخې ته دومره کار وشو، چې له دې مخکې نه و شوی. ده لیکوالانو ته په خطاب کې وویل چې هیڅ حق مو بې ځایه نه ځي او د هر لیکوال حق به د قانون په رڼا کې ترسره کوو. ښاغلي حماد د اطلاعاتو او فرهنګ وزارت په استازیتوب دا هم و ویل: هر هغه لیکوال چې د کتاب د چاپ توان نه لري، نو موږ یې ورته وړیا چاپوو، خو په دې شرط چې د نشر وړ به وي. دی زیاتوي چې اسلامي امارت نوي کتابونه له کره کتنې وروسته چاپوي او هغه چاپ شوي کتابونه چې له ارزښتونو سره په ټکر کې دي، له لوستونکو راټولېږي او د اسلامي امارت له خوا به یې لیکوالانو ته قیمت ورکول کېږي.

د یادونې وړ ده چې د بیهقي کتاب خپرولو ریاست په راتلونکي کې د هېواد په کچه د یو نندارتون د په لارې اچولو خبر هم ورکړی دی.

تاج محمد بهار

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *