له تېر شاوخوا يوه نيم کال راهيسې نړيوال له افغانانو سره بشري مرستې کوي، خو هر څومره مرستې چې ډېرېږي، په همغه اندازه نړيوال په افغانستان کې روان بحراني وضعيت د اندېښنې وړ بولي او د بېوزلۍ شمېرې لوړې اعلانوي.تازه د کډوالو او بېرته راستنېدونکو چارو سرپرست وزير له مرستندويه بنسټونو غوښتي چې ټولې بشري مرستې بايد له دوي سره په همغږۍ تر سره شي. د کډوالو او بېرته راستنېدونکو چارو سرپرست وزير خليل الرحمن حقاني د مرکزي او ولايتي رياستو نو د ستراتېژيکې همغږۍ په غونډه کې ټينګار وکړ، چې مرستندويه بنسټونه بايد د مرستو د وېش او سروې بهير د مهاجرينو چارو وزارت له استازو او د تر سره شويو مرستو لېست له دغه وزارت سره شريک کړي.ده زياته کړه: د کورنيو د سروې او پر هغوی د مرستو له وېشلو مخکې بايد مرستندويه ادارې د مرستو اندازه له وزارت سره شريکه کړي او د مرستو د اندازې له مخې، بايد د کورنيو سروې تر سره او مستحقې کورنۍ په نښه شي، چې په خپل سر او د وزارت له همغږۍ پرته به د مرستو وېش او ځينو کورنيو ته د مرستو نه وېشل د شخړو او شکونو لامل شي.په همدې حال کې د اقتصادي کارپوه حبيب الله عمار وايي: نړيوال چې د ميلياردونو ډالرو بشري مرستو خبره کوي، د دغو لويه سلنه په خپله بېرته همدغه مرسته کوونکي او د مرستو وېشونکي بنسټونه وړي: (( ډېره سلنه يې بېرته د مرستندويه بنسټونو دفتري لګښتونو، د موټرونو تېلو، د کارکوونکو معاشونو او داسې نورو باندې لګيږي، دويم قدم کې بيا يوه اندازه يې د کورنيو انجوګانو او بنسټونو په لګښتونو، معاشونو او دفتري چارو لګول کېږي، نو ډېره کمه اندازه يې اړمنو او کليوالو کسانو ته رسېږي چې د هغوی هېڅ درد نه شي دوا کولای.))
حبيب الله عمار ټينګار کوي ،چې که دغه بشري مرستې د کاري زمينو په رامنځته کولو ولګول شي، هم به د هېواد د پرمختګ لپاره کار شوي وي او هم به افغانان له دې لارې اوږد مهاله عوايد ولري: (( دغه کمه سلنه يې هم که داسې وېشل شوې وای، چې په بدل کې يې له خلکو کار غوښتل شواس وای، لکه د کابل ښاروالۍ، اوبو او برېښنا وزارت، کليو د پراختيا وزارت او نورو داسې بنسټونو له خوا پرې خلکو ته کاري زمينې برابرې شوې وای، دا به هم د خلکو هم د هېواد په ګټه وي.))
