د ننګرهار د ټولګټو او کډوالو او بېرته راستنېدونکو چارو رياست مسئولينو د يوې ګډې خبري غونډې له لارې د خپلو کړنو راپور له رسنيو سره شريک کړ.په دې غونډه کې د ټولګټو چارو رئيس مولوي يار محمد محمدي وويل، چې د اسلامي امارت له بريا وروسته يې پر لسګونه کيلومتره لويو سړکونو جغل اچولي او هغه سړکونه، پلونه او پُلچکونه، چې زيانمن وو، جوړ او د ترافيکو پرمخ خلاص شوي دي.محمدي زياته کړه، چې د لعلپورې ولسوالۍ ريناوو پرچاو سيمه کې يې ۱۷ کيلومتره نوي سړک جوړ کړي، چې له دې وړاندې د يادې سيمې خلک د سړک د نشتوالي له کبله له ګڼو ستونزو سره مخ وو.د نوموړي په خبره، د تورخم – جلال آباد لويې لارې د سړک ساتنې په موخه د ټولګټو چارو وزارت له بودجې څخه څو نوې تلې فعالې کړي، چې موخه يې د موټرو وزن کمول، په معيار يې برابرول او د سړکونو د تخريب مخنيوی دی.يار محمد محمدي وويل، چې په يادو ټولو پروژو شاوخوا ٢٠ ميليونه افغانۍ لګښت راغلی او همداشان د يو کال په موده کې يې ۱۷ ميليونه افغانۍ عوايد افغانستان بانک ته تحويل کړي دي.ورته مهال د کډوالو او بېرته راستنېدونکو چارو رئيس اکرام الدين مفتون وويل، چې د تېر يو کال په موده کې يې ۲۱ زره کورنيو سره نغدي، خوراکي او غير خوراکي توکو مرستې شوي او شاوخوا ۷۰۰ کسانو ته د کار زمينه برابر شوې ده.مفتون زياته کړه: (( په مختلفو ساحو کې ٣ زره کورنيو لپاره د مرسته کوونکو موسساتو په همکارۍ سرپناه او لازم امکانات برابر شوي، ٣ زره کسانو لپاره د کار په بدل کې نغدي او خوراکي توکي وېشل شوي او دغه راز ٣ زره هغه کورنۍ، چې بېرته هېواد ته راستنې شوي هغوي سره هم د مرسته کوونکو موسساتو په همکارۍ مرستې شوي، چې دا لړۍ اوس هم روانه ده.)) د نوموړي په وينا، هېواد ته بېرته راستنېدونکو کډوالو په مختلفو بهانو په نورو هېوادونو کې هېواد ته د راتلو پر وخت د ستونزو سره مخامخ وي، که چېرې نړيوالې او داخلي ادارې د کډوالو د اصولو سره سم کار وکړي، نو هره ورځ به په زرګونه کورنۍ خپل هېواد ته په اسانه توګه راستنې شي.
