د کرنې رئيس مولوي عبدالستار محمدي ويلي: بيرو ځنګل د کوز کونړ ولسوالۍ اړوند د شګې سيمې په غونډيو کې جوړېږي چې چارې ۸۰ سلنه بشپړې شوې دي.دی زياتوي: د بيرو ياد ځنګل په جوړېدو سره به د شاتو مچيو فارم لرونکو ته د مچيو روزلو ښه زمينه برابره شي.محمدي زياتوي: ((د ننګرهار کرنې رياست له لوري په ښېوې ولسوالۍ کې په ۱۵۰۰ جريبه ځمکه د بيرو ځنګل د جوړولو چارې پيل کړې او ۸۰ سلنه کار يې بشپړ شوی، چې د ځنګل په جوړېدو سره به ځايي خلکو ته د شاتو مچۍ د روزنې په هدف ووېشل شي او دغه راز به د شاتو مچيو روزنکو ستونزه هم حل شي. )) بلخوا، په ننګرهار کې د شاتو مچيو روزنکي شکايت کوي، چې ډېر کله د بېرو د ځنګلونو او باغونو د نشتوالي له امله مجبورېږي چې مچۍ له زياتو قانوني پروسو وروسته پاکستان ته ولېږدوي او هلته په لوړ لګښت شات توليد کړي.د شاتو مچيو د روزنکو فارمونو د ټولنې مشر رياض محمد رودوال هيله مند دی، چې دا ډول ځنګلونو په جوړېدو سره به مچۍ روزنکي له کړاو او د نورو هېوادونو له احتياجه خلاص کړي.رودوال زياته کړه: ((په دې وروستيو کې چې په ننګرهار، لغمان او هلمند ولايتونو کې د بيرو ځنګلونو د جوړولو چارې پيل شوې، دا يو ښه اقدام دی، نو له دې سره به د شاتو حاصلات زيات شي او له دې وړاندې د بيرو د ځنګلونو د نشت له امله خپلې مچۍ پاکستان ته انتقالولې او دا ځنګلونه بايد لا زيات شي. )) د شاتو مچيو د روزنې يو بل فارم لرونکي سيد احمد شاه وايي، پاکستان او نورو هېوادونو ته د مچيو له انتقال ستړي شوي، نو اړتيا ده ،چې په کور د ننه ورته د پلوڅو او بېرو مصنوعي باغونه جوړ شي.د ده په خبره: ننګرهار چې کرنيز ولايت دی او ډېرې سيمې يې د کال په ډېرو مياشتو کې شنې وي، د شاتو مچيو د روزلو لپاره مناسب ځاى دى.سيد احمد شاه زياته کړه: ((اوس هم زياتره د شاتو مچيو روزنکي د بيرو د ځنګلونو نشتون له امله خپلې مچۍ هر کال پاکستان ته د روزنې په خاطر وړي او له زياتو ستونزو سره مخ يو، نو غوښتنه مو دا ده، چې بايد دلته د بيرو او دغه راز د پلوڅې ځنګلونه جوړ شي. )) د ننګرهار د کرنې رياست د مالوماتو پر اساس اوس په دغه ولايت کې د شاتو د توليد لپاره د مچيو روزنې ۶۰۰ لوی او واړه فارمونه فعاليت کوي، چې هر کال شاوخوا پنځه سوه ټنه شات توليدوي.
