سختو بادونو، بارانونو او واورو په امريکا کې ګډوډي رامنځته کړې، د الوتکو په زرګونو پروازونه لغو شوي او ګڼې لويې لارې د ترافيکو پرمخ تړل شوې دي. د امريکا د هوا پېژندنې ادارې د راپور له مخې، په ځينو ځايونو کې د تودوخې درجه د سانتي ګراد په کچه له منفي څلورو درجو څخه ښکته ښودل شوې ده. د ژمي سختې يخنۍ ،چې د بادونو او سختو بارانونو سره مل ده، ۲۴۰ ميليونه امريکايان متاثره کړي دي. د راپورونو له مخې وړمه ورځ د امريکا په سويلي او ختيځو ايالتونو کې تر يو ميليونه زيات خلک له برېښنا بې برخې وو. د پروازونو د خبرتيا وېبپاڼې د معلوماتو له مخې، په ټوله امريکا کې تر ۳۵۲۰ ډېرې الوتنې لغوه شوې او ۱۹۰۰ پروازونه ځنډول شوي دي.
