د روڼتیا نړیوال سازمان په افغانستان کې د فساد په اړه په خپل تازه خپور کړي راپور کې ويلي، چې د طالبانو تر حاکمیت لاندې افغانستان په ۲۰۲۲ کال کې له فساد سره مبارزه کې تر پخوا څو چنده ښه شوی دی.
د ياد سازمان د ۲۰۲۲ کال په راپور کې راغلي، چې د ۱۸۰ هېوادونو په ډله کې افغانستان د شفافیت له اړخه ۱۵۰ ځای خپل کړی دی.
د همدې سازمان د ۲۰۲۱ کال د راپور له مخې، افغانستان د نړۍ د ۱۸۰ هېوادونو په ډله کې له فساد سره د مبارزې له اړخه ۱۷۴ یم هېواد و.
ياد سازمان، د نړۍ په ۱۸۰ هېوادونو کې د اداري فساد کچه او د مخنیوي لپاره یې د حکومتونو هلې ځلې ارزولي چې پکې د طالبانو تر حاکمیت لاندې افغانستان له فساد سره مبارزه کې د شفافیت ۲۴ امتیازونه خپل کړي چې د ۱۸۰ هېوادونو په ډله کې یې ۱۵۰ ځای خپل کړی دی.
د همدغه سازمان د ۲۰۲۱ کال راپور له مخې، افغانستان د ۱۶ امتیازونو په ترلاسه کولو سره د یادو هېوادونو په منځ ۱۷۴ یم ځای خپل کړی و چې پر فساد د ککړو هېوادونو په ډله کې یې شپږم ځای درلود.
د شفافیت نړیوال سازمان د سږني راپور په اساس ډنمارک د ۹۰ نومرو په تر لاسه کولو د یاد نوملړ په سر کې ځای لري، پاکستان د نوملړ په ۱۴۰ نمبر او ايران بيا ۱۴۷ تر ټولو په فساد ککړ هېواد دی.
ويلی شو، چې افغانستان په ۲۰۲۲ کال کې د نوملړ د پیل له لوري د ۱۸۰ هېوادونو په ډله کې ۱۵۰ شفاف هېواد دی، خو د نوملړ د پای له لوري بیا هم ۳۰ په فساد ککړ هېواد بلل شوی دی.
د یادولو ده چې تېره اونۍ نړیوال بانک هم تېر ۲۰۲۲ کال افغانستان لپاره په مالي او اقتصادي برخو کې نسبتآ ښه ارزولی و.
