د افغانستان اسلامي امارت وايي: دوی تر اوسه ۱۴ هېوادونو ته خپل ډيپلوماتان لېږلي او هڅې روانې دي ،چې د نورو ډيپلوماتيکو مرکزونو کنټرول هم ترلاسه کړی. د سرپرست حکومت وياند ويلي، چې د تېر حکومت ډيپلوماتان له بهرنيو چارو وزارت سره په همغږۍ خپلو فعاليتونو ته دوام ورکوي. نوموړي ويلي: دوی ايران، ترکيې، پاکستان، روسيې، چين، قزاقستان او نورو عربي يا هم افريقايي هېوادونو ته خپل ډيپلوماتان لېږلي. تر اوسه د نړۍ يوه هېواد هم د افغانستان حکومت په رسميت نه دي پېژندلي ،خو پاکستان، ترکيې، قطر او چين په افغانستان کې فعال ډيپلوماتيک ماموريتونه لري.
