اروپايي ټولنه په افغانستان کې د ترهګرو ډلو د ځپلو لپاره د اسلامي امارت له هڅو راضي ده.د افغانستان لپاره د اروپايي ټولنې ځانګړي استازي د اسلامي امارت چارواکي وستايل، چې د خبرو لپاره ليوالتيا لري او د ترهګرو ډلو؛ په ځانګړي توګه د داعش د ځپلو هڅې کوي.د افغانستان لپاره د اروپايي ټولنې ځانګړى استازى وايي: له اسلامي امارت څخه د نړيوالې ټولنې او د افغانستان د ګاونډيانو يوه اساسي او اړينه غوښتنه د تروريستي ډلو ځپل دي، چې امارت يې په ښه توګه ځپلی شي.توماس نيکلاسون له آريانا نيوز سره په ځانګړې مرکه کې ويلي، چې ترهګري په ځانګړې توګه داعش د افغانستان او نړۍ امنيت ته ګواښ دی، نو اسلامي امارت بايد په دې برخه کې خپلې هڅې لا ګړندۍ کړي.د افغانستان لپاره د اروپايي ټولنې ځانګړي استازي توماس نيکلاسون وايي: د ترهګرو ډلو په ځانګړي توګه د داعش ډلې او د دغې ډلې د خراسان څانګې پر وړاندې د طالبانو مبارزه د پام وړ ده. اسلامي امارت په ځلونو ويلي، چې داعش د افغانستان امنيت ته ګواښ ندی او دوی نه غواړي، چې دغې ډلې ته اجازه ورکړ شي، چې له افغانستان څخه بهر سيمې او ګاونډ هېوادونو ته ګواښ پېښ کړي.
